അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തെന്നിന്ത്യൻ പ്രേക്ഷകർക്ക് സുപരിചിതയാണ് ഐശ്വര്യ ലക്ഷ്മി. സോഷ്യൽ മീഡിയയിൽ ഇപ്പോൾ താരം സജീവമല്ലെങ്കിലും താരം പങ്കെടുക്കുന്ന പരിപാടികൾ ഏറെ ശ്രദ്ധ നേടാറുണ്ട്. മുൻപ് ഉദ്ഘാടനത്തിനെത്തിയ താരത്തിന്റെ വസ്ത്രധാരണത്തിനെതിരെ വൻ വിമർശനങ്ങൾ ഉയർന്നിരുന്നു. ഇപ്പോഴിതാ വീണ്ടും ഗ്ലാമർ വേഷമണിഞ്ഞ് പൊതുവേദിയിലെത്തിയിരിക്കുകയാണ് ഐശ്വര്യ ലക്ഷ്മി.
ഒരു ജ്വല്ലറിയുടെ പരിപാടിയിൽ പങ്കെടുക്കാനെത്തിയപ്പോൾ താരമണിഞ്ഞ വേഷം സമൂഹമാധ്യമങ്ങളിൽ ചർച്ചയാവുകയാണ്. ഓഫ് വൈറ്റ് വെസ്റ്റേൺ ഔട്ട്ഫിറ്റ് ധരിച്ചാണ് ഐശ്വര്യ ലക്ഷ്മി പരിപാടിയിൽ പങ്കെടുക്കാനെത്തിയത്. താരത്തിന്റെ ഗ്ലാമർ ചിത്രങ്ങൾ വളരെ വേഗം സമൂഹമാധ്യമങ്ങളിൽ വൈറലായി. താരത്തിന്റെ വസ്ത്രധാരണത്തിനെതിരെ കടുത്ത വിമർശനമാണ് സമൂഹമാധ്യമങ്ങളിൽ നിന്നുയരുന്നത്.
ഇതിനു മുൻപും ഗ്ലാമർ വേഷങ്ങൾ ധരിച്ച് പൊതുഇടത്തിൽ പ്രത്യക്ഷപ്പെട്ട് വലിയ ട്രോളുകൾക്ക് വിധേയയായിട്ടുണ്ട് താരം. ചെന്നൈയിലെ ഒരു പ്രമുഖ സ്ഥാപനത്തിന്റെ ഉദ്ഘാടന ചടങ്ങിൽ പങ്കെടുക്കാനെത്തിയപ്പോൾ ധരിച്ച വേഷമായിരുന്നു വിമർശനങ്ങൾക്ക് ഇടയാക്കിയത്. മഞ്ഞ നിറത്തിലുള്ള സ്ട്രാപ്ലെസ്സ് സ്ലീവ്ലെസ്സ് വസ്ത്രം ധരിച്ചാണ് താരം പരിപാടിയിൽ എത്തിയത്. ഈ വേഷം ഉദ്ഘാടനത്തിന് അനുയോജ്യമല്ലെന്നായിരുന്നു അന്ന് ഉയർന്ന വിമർശനം.
എന്നാൽ, സൈബർ ഇടങ്ങളിലെ അനാവശ്യ കമന്റുകൾക്കും വിമർശനങ്ങൾക്കും താൻ വലിയ വില നൽകുന്നില്ലെന്ന് താരം നേരത്തെ തന്നെ വ്യക്തമാക്കിയിരുന്നു. ഇതിന്റെ ഭാഗമായി തന്റെ ഇൻസ്റ്റാഗ്രാം ഉൾപ്പെടെയുള്ള സോഷ്യൽ മീഡിയ അക്കൗണ്ടുകൾ ഐശ്വര്യ കുറച്ചു നാളുകൾക്ക് മുൻപ് നീക്കം ചെയ്തിരുന്നു.
താരത്തിന്റെ സ്വകാര്യതയെയും വസ്ത്രധാരണത്തിനുള്ള സ്വാതന്ത്ര്യത്തെയും മാനിക്കണമെന്ന വാദവുമായി ഐശ്വര്യയെ പിന്തുണച്ചും ആരാധകർ രംഗത്തെത്തുന്നുണ്ട്. സിനിമയിൽ മാത്രമല്ല, ഫാഷൻ ലോകത്തും തന്റെ നിലപാടുകൾ കൊണ്ട് ശ്രദ്ധേയയായ ഐശ്വര്യ ലക്ഷ്മി ഈ വിവാദങ്ങളോട് എങ്ങനെ പ്രതികരിക്കുമെന്നാണ് ആരാധകർ ഉറ്റുനോക്കുന്നത്.
