അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ബിഗ് ടിവി ചീഫ് എഡിറ്റർ സുജയ പാർവ്വതി നൽകിയ അപകീർത്തി പരാതിയിൽ ഓൺലൈൻ മാധ്യമപ്രവർത്തകൻ ഹൈദരലിയുടെ ഓഫീസിൽ കാക്കനാട് സൈബർ പോലീസിന്റെ മിന്നൽ റെയ്ഡ്. പരിശോധനയിൽ വീഡിയോ റെക്കോർഡിംഗിനായി ഉപയോഗിച്ച മൊബൈൽ ഫോണും അനുബന്ധ ഉപകരണങ്ങളും പോലീസ് പിടിച്ചെടുത്തു.
ബിഗ് ടിവി സ്ഥാപനത്തിനുള്ളിൽ ജീവനക്കാർക്ക് നേരെ ചീഫ് എഡിറ്റർ സുജയ പാർവ്വതിയും മറ്റ് ഉന്നത ഉദ്യോഗസ്ഥരും മാനസിക പീഡനം നടത്തുന്നതായി ആരോപിച്ച് മുൻ ജീവനക്കാരി തൊഴിൽ വകുപ്പിനും മാനേജ്മെന്റിനും നൽകിയ ഗുരുതരമായ പരാതിയുടെ വിശദാംശങ്ങൾ ഹൈദരലി തന്റെ ഓൺലൈൻ ചാനലിലൂടെ വാർത്തയായി പുറത്തുവിട്ടിരുന്നു.
ഇതിന് പിന്നാലെയാണ് അപകീർത്തിപ്പെടുത്തലും വ്യക്തിഹത്യയും ആരോപിച്ച് സുജയ പാർവ്വതി പോലീസിനെ സമീപിച്ചതും അടിയന്തര റെയ്ഡിലേക്ക് കാര്യങ്ങൾ നീങ്ങിയതും.
ജീവനക്കാരിയുടെ ആരോപണം:
ബിഗ് ടിവിയിൽ സീനിയർ സബ് എഡിറ്ററായിരുന്ന വനിതാ മാധ്യമപ്രവർത്തക ഉന്നത മാനേജ്മെന്റിനെതിരെ തൊഴിൽ വകുപ്പ് ഓഫീസിനും ഇന്റേണൽ കമ്മിറ്റിക്കും സമർപ്പിച്ച പരാതിയുടെ പകർപ്പുകൾ ഹൈദരലി പുറത്തുവിട്ടതാണ് കേസിന് ആധാരം.
ചീഫ് എഡിറ്റർ സുജയ പാർവ്വതി, ബ്യൂറോ ചീഫ് വൈശാഖ് കൊമട്ടിൽ, അനിൽ അയിരൂർ എന്നിവർക്കെതിരെയാണ് 2026 സെപ്റ്റംബർ 9-ന് വനിതാ മാധ്യമപ്രവർത്തക എച്ച്ആർ വിഭാഗത്തിനും ഇന്റേണൽ കമ്മിറ്റിക്കും പരാതി ഇമെയിൽ വഴി അയച്ചത്.
ജോലിസ്ഥലത്ത് നിരന്തരമായി അപമാനിക്കൽ, മാനസിക സമ്മർദ്ദം, ഭീഷണിപ്പെടുത്തൽ, തഴയപ്പെടൽ എന്നിവ നേരിടേണ്ടി വന്നതായി പരാതിയിൽ വ്യക്തമാക്കുന്നു. ഒരു വയസ്സുള്ള കുഞ്ഞിന്റെ അമ്മയാണെന്ന പ്രാഥമിക പരിഗണന പോലും നൽകാതെയാണ് ചീഫ് എഡിറ്റർ തന്നെ പാർശ്വവൽക്കരിച്ചതെന്നും പരാതിക്കാരി ചൂണ്ടിക്കാട്ടി.
ബ്യൂറോയിൽ നിന്നും തന്നെ നിർബന്ധപൂർവ്വം ഡെസ്ക് വിഭാഗത്തിലേക്ക് മാറ്റിയത് വ്യക്തിപരമായ വൈരാഗ്യം തീർക്കാനും കരിയർ തകർക്കാനുമായിരുന്നുവെന്നും അവർ ആരോപിക്കുന്നു.
പരാതി നൽകിയതിന് തൊട്ടുപിന്നാലെ ബിഗ് ടിവി മാനേജ്മെന്റ് സ്വീകരിച്ച പ്രതികാര നടപടിയും ഹൈദരലി തന്റെ വീഡിയോ റിപ്പോർട്ടിലൂടെ ജനങ്ങളിലെത്തിച്ചിരുന്നു. സെപ്റ്റംബർ 9-ന് ഉച്ചയ്ക്ക് 3 മണിയോടെ പീഡന പരാതി സമർപ്പിച്ച ജീവനക്കാരിക്ക്, കൃത്യം ഒരു മണിക്കൂറിനകം (വൈകുന്നേരം 4 മണിക്ക്) എച്ച്ആർ വിഭാഗത്തിൽ നിന്നും പിരിച്ചുവിട്ടുകൊണ്ടുള്ള ഔദ്യോഗിക ഇമെയിൽ ലഭിച്ചു.
പ്രൊബേഷൻ കാലയളവിലായിരുന്നുവെങ്കിലും സർവീസ് ചട്ടങ്ങളോ സ്വാഭാവിക നീതിയുടെ തത്വങ്ങളോ പാലിക്കാതെ, ഒരു കാരണം കാണിക്കൽ നോട്ടീസോ വിശദീകരണം നൽകാനുള്ള അവസരമോ നൽകാതെയായിരുന്നു ഈ അടിയന്തര നടപടി.
പരാതി പരിശോധിക്കേണ്ട ഇന്റേണൽ കമ്മിറ്റിയിൽ ആരോപണവിധേയരായ ആളുകൾ തന്നെയുണ്ടെന്നും, അന്വേഷണം നടക്കാതിരിക്കാൻ ബോധപൂർവ്വമാണ് തന്നെ ജോലിയിൽ നിന്ന് നീക്കിയതെന്നും അവർ ലേബർ കമ്മീഷണർക്ക് നൽകിയ ഹർജിയിൽ ബോധിപ്പിച്ചിട്ടുണ്ട്.
ഈ സംഭവങ്ങൾ ചൂണ്ടിക്കാട്ടി ഹൈദരലി നടത്തിയ ഓൺലൈൻ വാർത്താ പ്രക്ഷേപണങ്ങൾ ചാനലിന്റെയും ചീഫ് എഡിറ്ററുടെയും സൽപ്പേരിന് കളങ്കം വരുത്തിയെന്ന് കാട്ടിയാണ് സുജയ പാർവ്വതി കാക്കനാട് പോലീസിൽ ക്രിമിനൽ പരാതി നൽകിയത്.
പരാതി ലഭിച്ചയുടൻ അതിവേഗത്തിൽ നടപടിയെടുത്ത കാക്കനാട് പോലീസ് സംഘം ഹൈദരലിയുടെ ഓഫീസിലെത്തി വിവരങ്ങൾ ശേഖരിക്കുകയും, വീഡിയോ നിർമ്മാണത്തിന് ഉപയോഗിച്ച പ്രധാന സ്മാർട്ട്ഫോണും അനുബന്ധ ഇലക്ട്രോണിക് ഉപകരണങ്ങളും പിടിച്ചെടുക്കുകയുമായിരുന്നു. സംഭവത്തിൽ ഡിജിറ്റൽ ഫോറൻസിക് പരിശോധന നടത്താനാണ് പോലീസിന്റെ തീരുമാനം.
തൊഴിലിട പീഡന പരാതിയിൽ തൊഴിൽ വകുപ്പ് അധികൃതർ ചാനൽ മാനേജ്മെന്റിനോട് വിശദീകരണം തേടിയേക്കുമെന്നാണ് വിവരം.
എന്നാൽ ഒരു തൊഴിലിടത്തിലെ സ്ത്രീ ജീവനക്കാരി ഉന്നയിച്ച ഗുരുതരമായ പീഡന പരാതി റിപ്പോർട്ട് ചെയ്തതിന്റെ പേരിൽ മാധ്യമപ്രവർത്തകന്റെ ഓഫീസ് റെയ്ഡ് ചെയ്ത നടപടിക്കെതിരെ സോഷ്യൽ മീഡിയയിലും മാധ്യമപ്രവർത്തകർക്കിടയിലും വലിയ വിമർശനമാണ് ഉയരുന്നത്.
