അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.യുഎഇയിൽ ബാങ്ക് ഉപയോക്താക്കൾ ഒരു ബാങ്കിൽ നിന്നുള്ള വായ്പകൾ മറ്റൊന്നിലേക്ക് മാറ്റുന്നതിന് (ലോൺ ട്രാൻസ്ഫർ) കർശനമായ മാനദണ്ഡങ്ങൾ ഏർപ്പെടുത്താൻ ഒരുങ്ങുന്നു. സാമ്പത്തിക മേഖലയിൽ കൂടുതൽ സുതാര്യതയും സ്ഥിരതയും ഉറപ്പാക്കുന്നതിന്റെ ഭാഗമായി കൊണ്ടുവരുന്ന പുതിയ നിയമങ്ങൾ 2027 ജനുവരി 1 മുതൽ പ്രാബല്യത്തിൽ വരാനാണ് സാധ്യത.
ഇതനുസരിച്ച് വായ്പ മറ്റൊരു ബാങ്കിലേക്ക് മാറ്റുന്നതിന് മുൻപ് നിലവിലെ ബാങ്കിൽ നിശ്ചിത കാലയളവ് പൂർത്തിയാക്കുകയും നിശ്ചിത ഗഡുക്കൾ കൃത്യമായി അടച്ചുതീർക്കുകയും ചെയ്യേണ്ടത് നിർബന്ധമായിരിക്കും.
ആകർഷകമായ പുതിയ ഓഫറുകൾ കണ്ട ഉടൻ വായ്പകൾ പെട്ടെന്ന് മാറ്റുന്ന പ്രവണതയ്ക്ക് തടയിടുകയാണ് പുതിയ പരിഷ്കാരത്തിലൂടെ അധികൃതർ ലക്ഷ്യമിടുന്നത്. ഇത്തരം പെട്ടെന്നുള്ള മാറ്റങ്ങൾ മൂലം ബാങ്കുകൾക്കുണ്ടാകുന്ന അധിക ചെലവുകളും സാമ്പത്തിക റിസ്കുകളും കുറയ്ക്കാൻ ഇത് സഹായിക്കും.
വ്യക്തിഗത വായ്പകൾ ഉൾപ്പെടെ വിവിധ തരം വായ്പകൾക്ക് അനുയോജ്യമായ പ്രത്യേക മാർഗനിർദേശങ്ങളും, വായ്പ മാറ്റുന്നതിന് മുൻപ് അടയ്ക്കേണ്ട കുറഞ്ഞ ഗഡുക്കളുടെ വിവരങ്ങളും ഉടൻ തന്നെ ഔദ്യോഗികമായി പുറത്തിറക്കും.
പുതിയ ചട്ടങ്ങൾ നിലവിൽ വരുന്നതിന് മുൻപായി ഉപയോക്താക്കളെ ആകർഷിക്കാൻ കുറഞ്ഞ പലിശ നിരക്കുകളും തിരിച്ചടവ് നീട്ടിവെക്കൽ (ഡിഫർമെന്റ്) ആനുകൂല്യങ്ങളുമായി ബാങ്കുകൾ വലിയ മത്സരമാണ് നടത്തുന്നത്.
എന്നാൽ കുറഞ്ഞ പ്രതിമാസ ഗഡുക്കൾ മാത്രം കണ്ട് ധൃതിപിടിച്ച് തീരുമാനം എടുക്കരുതെന്നും, കരാറുകളിലെ ആകെ തുകയും കാലാവധിയും കൃത്യമായി പരിശോധിക്കണമെന്നും സാമ്പത്തിക വിദഗ്ധർ മുന്നറിയിപ്പ് നൽകുന്നു.
ബാങ്കുകളുടെ വൻ ഓഫറുകളിൽ വഞ്ചിക്കപ്പെടാതെ സാമ്പത്തിക ബാധ്യതകൾ കൃത്യമായി വിലയിരുത്തിയ ശേഷം മാത്രം ലോൺ ട്രാൻസ്ഫർ നടത്തുക.
